काठमाडौँ, १४ वैशाख: नयाँ बानेश्वर क्षेत्र यतिखेर तनावग्रस्त बनेको छ । विगत २६ दिन देखी आन्दोलनरत शिक्षकले नयाँ बानेश्वरस्थित निषेधित क्षेत्र तोड्न थाले पछि प्रहरीले पानीको फोहोरा प्रहार गरेको छ।
नयाँ बानेश्वरमा प्रहरीको ब्यारिकेड तोड्न खोजेपछि पानीको फोहोरा प्रहार गरिएको जिल्ला प्रहरी परिसर काठमाडौँका एसपी अपिलराज बोहोराले जानकारी दिनुभयो ।
“प्रहरीको ब्यारिकेड तोड्न खोजेपछि पानीको फोहोरा प्रहार भएको छ, अहिलेसम्म स्थिति नियन्त्रणमा नै छ, कुनै अप्रिय घटना घटेको छैन्’ उहाँले भन्नुभयो ।
विद्यालय शिक्षा ऐन जारी गर्नुपर्ने मागसहित विगत २६ दिनयता शिक्षक महासंघ काठमाडौंकेन्द्रित सडक आन्दोलनमा रहेको छ । सरकारसँग वार्ता सफल नभए पछि उनीहरू बिहानै ११ः०० बजे देखी नयाँ बानेश्वर–माइतीघर सडक अवरुद्ध गरेर बसिरहेका छन् ।
