बिर्तामोड, २२ जेठ : इलाका प्रहरी कार्यालय बिर्तामोडले चोरीको आरोपमा ३ जनालाई पक्राउ गरेको छ ।
प्रहरीले बिर्तामोड ४ स्थित एक घरमा चोरीमा संलग्न भएको आरोपमा तीन जनालाई पक्राउ गरेको हो । पक्राउ पर्नेमा बिर्तामोड ७ का २७ वर्षीय दिपेश खवास, बिर्तामोड ४ का ३५ वर्षीय पवन चौधरी र मेचीनगर १० धुलावारीका ३३ वर्षीय आशिष श्राप रहेका छन् ।
उनीहरुले हिमशिखर टोलमा रहेको कमला कार्कीको घरबाट पाँच तोला आठ आनी सुनबाट बनेका गरगहना ब्रास्लेट,सिक्री,चन्द्रमा, चोकर, लकेट चोरी गरी विक्री वितरण गरेका थिए ।
प्रहरीले सुन चोरी गर्ने खवास, चोरीको सामान किन्ने चौधरी र श्रापलाई पक्राउ गरेर अनुसन्धान अघि बढाएको हो । उनीहरुलाई चोरीको मुद्दा दर्ता गरेर म्याद थप गरी अनुसन्धान अघि बढाएको इलाका प्रहरी कार्यालय अनारमनीका डिएसपी विजय श्रेष्ठले जानकारी दिनु भयो ।
चोरी गरेको सुन खवासबाट पहिला चौधरीले किनेर त्यसपछि श्रापलाई विक्री गरेको खुलेपछि प्रहरीले श्रापले सञ्चालन गर्दै आएको जय ज्वेलर्समा छापा मारेको थियो ।
बिर्तामोड पछिल्लो समय यता चोरीको घटना बढ्दै गएका छन् । हिजोमात्रै वडा नम्बर १ स्थित हनुमान टोलमा रहेको विवेक पाण्डे र पुस्कर पाण्डेको घरबाट १२ तोला सुन र नगदसहित २२ लाख रुपैयाँ भन्दा बढीको चोरी भएको छ ।
सुनचाँदी व्यवसायी संघका अनुसार २०८२ बैशाख यतामात्रै ३३ तोला भन्दा बढी सुन चोरी भएको निवेदन परेको छ । तर ईलाका प्रहरी कार्यालय बिर्तामोडले भने तीन, चार वटा मात्रै निवेदन परेको र घटनामा संलग्न भएकाहरुको खोजी भईरहेको जनाएको छ ।
