झापा । बिर्तामोड नगरपालिकाले क्षयरोग मुक्त अभियान अन्तर्गत स्वास्थ्यकर्मीहरुलाई बेसिक मोडुलर तालिम प्रदान गरेको छ ।
स्वास्थ्य शाखाको आयोजनामा बैशाख १६ गतेदखि १८ गते आजसम्म तालिम सञ्चालन भएको हो । महेन्द्र रत्न माध्यमिक विद्यालयको हलमा आयोजित तालिममा बिर्तामोड नगरअस्पतालका मेडिकल सुपरिटेन्डेन्ट डा. सुनिल अधिकारी, स्वास्थ्य कार्यालय झापाका जनस्वास्थ्य निरिक्षक विश्वनाथ श्रेष्ठ, बिर्तामोड नगरपालिकाका क्षयरोग फोकल पर्सन दिपक सापकोटा र बिर्तामोड नगर अस्पतालका जनस्वास्थ्य निरिक्षक अजय वि.कले प्रशिक्षण दिनु भएको थियो ।
तालिममा क्षयरोगको लक्षण, चिन्ह, उपचार, पद्वति, यसबाट हुने असर, उपचार, समय र समाजमा पारेको प्रभावका विषयमा चर्चा गरिएको छ ।
सहभागीहरुलाई क्षयरोगीले औषधी सेवन गर्नु पर्ने समयावधि , यसबाट हुन सक्ने खतरा, समाजमा लुकेर बसेका संकास्पद बिरामीको खाजी, भेटिएका बिरामीको निशुल्क उपचार लगायतका विषयमा प्रक्षिण प्रदान गरीएको जनाइएको छ ।
तालिम समापन कार्यक्रममा बिर्तामोड नगरपालिकाका स्वास्थ्य शाखा प्रमुख राजिव कृष्ण विष्ट, स्वास्थ्य कार्यालय झापाका प्रमुख वरिष्ठ जनस्वास्थय अधिकृत रमेश बाह्रकोटी लगायतको उपस्थिति रहेको थियो ।
