शिवसताक्षी, १५ साउन : शिवसताक्षी नगरपालिका १०, दुधेमा निर्माणाधीन दुधे रंगशालामा आगामी कात्तिक १५ देखि २२ गतेसम्म अन्तर्राष्ट्रिय आमन्त्रण महिला नकआउट फुटबल प्रतियोगिता हुने भएको छ। प्रतियोगिता झापा महिला गोल्डकपको आयोजनामा हुन लागेको हो।
आयोजक अध्यक्ष सन्तोष थोप्राका अनुसार महिला फुटबलको प्रवर्द्धन, ग्रामीण क्षेत्रका खेलाडी उत्पादन र झापालाई महिला फुटबलको हब बनाउने लक्ष्यसहित प्रतियोगिता आयोजना गरिएको हो। प्रतियोगितामा नेपालका तीन विभागीय टोली (आर्मी, एपीएफ, प्रहरी), भारत, भुटान, दुई ए डिभिजन क्लब र आयोजक टिमसहित आठ टोलीको सहभागिता रहनेछ।
प्रतियोगिताको विजेता टिमलाई नेपालमै सर्वाधिक पुरस्कार राशी दिने तयारी गरिएको छ। उत्कृष्ट खेलाडी, प्रशिक्षक र खेलको ‘प्लेयर अफ दी म्याच’लाई नगदसहित ट्रफी प्रदान गरिनेछ।
प्रतियोगिताको अवसरमा दुधे रंगशालाको औपचारिक उद्घाटन समेत गरिनेछ। हालसम्म रंगशालामा दुई करोड १८ लाख खर्च भइसकेको र थप निर्माणका लागि संघीय सरकारबाट तीन करोड तथा नगरपालिकाबाट ५० लाख विनियोजन भएको नगरप्रमुख मेघाहाङ थोप्राले जानकारी दिए।
आयोजकले प्रतियोगितालाई झापामा महिला फुटबलको ऐतिहासिक सुरुआतका रूपमा अगाडि बढाउने प्रतिबद्धता जनाएको छ । प्रतियोगिताको संयोजकमा जलकुमार गुरुङ रहनु भएको छ ।
