झापा, १६ साउनः झापा जिल्ला मेचीनगर नगरपालिका–९, खुट्टिडाँगि स्थित भित्री सडकखण्डमा पारिजात पब्लिक स्कुलको भ्यान दुर्घटना हुँदा २१ जना घाइते भएका छन्। मागुरमाडि बाट पारिजात पब्लिक स्कुलतर्फ जाँदै गरेको मे १ ज ३१०७ नम्बरको भ्यान अनियन्त्रित भई अन्दाजि बिहान १० बजे दुर्घटना भएको हो।
दुर्घटनामा परेर स्कुलका शिक्षक, चालक र अधिकांश बालबालिका घाइते भएका छन्। घटनालगत्तै ईलाका प्रहरी कार्यालय धुलाबारीबाट प्रहरी निरीक्षक पाण्डव कुमार राजवंशीको नेतृत्वमा टोली घटनास्थल पुगेर उद्धार गरेको थियो। घाइतेहरूको उपचार हाल धुलाबारीस्थित आम्दा अस्पताल तथा बिर्तामोडस्थित बि एण्ड सी अस्पतालमा भइरहेको छ ।
दुर्घटनामा भ्यानका चालक गणेश श्रेष्ठ, शिक्षिका प्रिति सिवा, विद्यार्थीहरू सबिस्का राई, समिरा बिसुङ्खे, संयोग बिसुङ्खे, सोबिस्काराई र अंगु बराई मगरको बि एण्ड सी अस्पताल बिर्तामोडमा उपचार भइरहेको प्रहरीले जनाएको छ।
त्यस्तै अन्य घाइते विद्यार्थीहरू आदित्य राई, सदिक्षा काफ्ले, सोहित राजवंशी, आयान सुब्बा, अनुराग तामाङ, कृष्पा राई, आयानिबि.क, प्रनिस राई, समर्पण राई, सुसिता किसान, तानसोना लिम्बु र सेसेहाङ लिम्बुको धुलाबारीस्थित आम्दा अस्पतालमा उपचारभइरहेको छ।
इलाका प्रहरी कार्यालय धुलाबारीका अनुसार चालक गणेश श्रेष्ठसँग सवारी चालक अनुमति पत्र (लाइसेन्स) रहेको र मादक पदार्थसेवन नगरेको प्रारम्भिक अनुसन्धानबाट खुलेको छ। घटनाबारे थप अनुसन्धान भइरहेको प्रहरीले जनाएको छ ।
