धनुषा, २१ साउन : धनुषामा सशस्त्र प्रहरी बल नेपाल र तस्कर समूहबीच झडप भएको छ। भारतबाट अवैध रूपमा नेपालतर्फ ल्याइँदै गरेको सामान नियन्त्रणमा लिने क्रममा आज साँझ करिब सवा ८ बजे विदेह नगरपालिका–२, दुहवीस्थित आँप बगैंचामा झडप भएको हो।
सशस्त्र प्रहरी बल नेपाल, प्रस्तावित सीमा सुरक्षा गुल्म महिनाथपुरबाट डिएसपीको कमाण्डमा खटिएको सुरक्षादलले तस्करीको सामान नियन्त्रणमा लिन खोज्दा तस्कर समूह र स्थानीय बासिन्दाहरूले प्रहरीमाथि ढुंगामुढा गरेका थिए।
स्थिति नियन्त्रणमा लिन सुरक्षाकर्मीहरूले एसएलआरबाट ४ राउण्ड हवाई फायर गरेका थिए। झडपका क्रममा केही तस्करीका सामानहरू स्थानीयले लुकाएको जनाइएको छ। तर, एक थान मोटरसाइकल र केही किराना सामान भने सुरक्षाकर्मीले नियन्त्रणमा लिएका छन्।
बरामद गरिएका सामान र मोटरसाइकल आवश्यक कानुनी कारबाहीका लागि सम्बन्धित निकायमा बुझाउने प्रक्रियामा रहेको सशस्त्र प्रहरी बल नेपालका सह–प्रवक्ता डिएसपी शैलेन्द्र थापाले जानकारी दिनुभयो।
