शिवसताक्षी, २२ साउनः झापाको शिवसताक्षीमा नेवा समुदायले क्वाटी तथा लाखे नाच साँस्कृतिक कार्यक्रम २०८२ गर्ने भएको छ । नेवार राष्ट्रिय संगठन शिवसताक्षी नगर समितिले आगामी साउन २४ गते लाखे नाच तथा क्वाटी कार्यक्रमको आयोजना गरेको जनाएको छ । लाखे नाचसहित विभिन्न सास्कृतिक कार्यक्रम शिवसताक्षीको फुलबारी खेल मैदानमा हुने भएको हो ।
समुदायलाई एकतामा बाध्न साँस्कृतिक कार्यक्रमहरुले ठुलो भूमिका खेल्ने भएकाले पनि यस कार्यक्रमको आयोजना गरिएको नेवार राष्ट्रिय संगठन शिवसताक्षी नगर समितिका सचिव सचिन श्रेष्ठले बताउनुभयो । उहाँले क्वाटी तथा लाखे नाच साँस्कृतिक कार्यक्रम २०८२ लाई सफल बनाउन संस्कृति प्रेमी, विभिन्न संघ संस्था, स्थानीय बासी, देश विदेशमा रहनु हुने दाजु भाईहरुलाई समेत सहयोग अपेक्षा गरिएको जानकारी दिनुभयो ।
कार्यक्रमबाट संकलित रकमले सस्थाको साँस्कृतिक कोष निर्माण गर्ने, स्थानीय संस्कृति प्रेमीहरुलाई योगदानका आधारमा सम्मान गर्ने, विपद व्यवस्थापन कोष स्थापना गर्ने र शिवसताक्षी नगर भित्र रहेको धार्मिक तथा पर्यटकीय क्षेत्रहरुको प्रचार प्रसार गर्ने उद्देश्यले रहेको नेवार राष्ट्रिय संगठन शिवसताक्षी नगर समितिले जनाएको छ ।
कार्यक्रममा नेवा समुदायको भेष भुषा, सांस्कृतिक पहिचान लगायत सबै जात जातिका संस्कृतिहरुलाई समेट्दै साझा कार्यक्रम गर्ने उद्देश्य रहको नेवार राष्ट्रिय संगठन शिवसताक्षी नगर समितिका अध्यक्ष प्रदिउन श्रेष्ठले जानकारी दिनभयो ।
कार्यक्रममा राष्ट्रिय तथा स्थानीय कलाकारहरुबाट बेजोड प्रस्तुती रहने बताइएको छ । कार्यक्रम स्थलमा खानेपानी र खाजाको रुपमा क्वाटीको व्यवस्था मिलाइने छ । कार्यक्रम सफल बनाउन प्रयोजन गर्ने संघ संस्था वा व्यक्तिलाई सम्मान गरिने समेत आयोजक संस्थाले जनाएको छ ।
कार्यक्रम सफल बनाउन ३ लाख ५० हजार खर्चको अनुमान गरिएको कोषाध्यक्ष चन्द्र प्रधानले जानकारी दिनुभयो । उहाँका अनुसार शिवसताक्षी नगरपालिका र स्थानीय बासी, विभिन्न संघ संस्थाबाट सहयोगको अपेक्षा गरिएको छ ।
२०८१ सालमा स्थापना भएको नेवार राष्ट्रिय संगठन शिवसताक्षी नगर समितिले विभिन्न कार्यक्रमहरु गर्दै आएको छ ।
