झापा । बिर्तामोड नगरपालिका वडा नम्बर २ मा रहेको पुजा प्लाई उद्योगमा मजदुरहरुले तालाबन्दी गरेर काम ठप्प बनाएका छन् । उनीहरुले आज आइतबार गेटमा तालाबन्दी गरी काम ठप्प बनाएका हुन् ।
उद्योगमा कार्यरत भारत बिहार घर भएका अन्दाजी ४५ वर्षिय पुरुषले सोही उद्योगमा कार्यरत एक महिलालाई गत शुक्रवार दुर्व्यवहार गरेको र प्रहरीमा जाहेरी दिएर पक्राउ गरिसकेको अवस्थामा नेपाली ३० जना स्थानीय मजदुरलाई कामबाट निकालिएपछि आन्दोलन शुरु भएको हो ।
मजदुरहरुले विहानै देखि गेटमा तालावन्दी गरेर पुर्नवहालीको माग गर्दै आन्दोलन गरेका हुन् । उनीहरुले तालावन्दी पछि वडा नम्बर २को कार्यालयमा पुगेर न्यायको माग गर्दै निवेदन समेत दर्ता गराएका छन् । उद्योगमा करिब चार सय जना मजदुर कार्यरत छन् । जसमध्ये ३० जना बाहेक सबै भारतीय रहेको बुझीएको छ । कामबाट निकालिएका मजदुरलाई पुनर्वहालि नगरी उद्योग सञ्चालन हुन नदिने एक मजदुरले जानकारी दिए ।
वडा नम्बर २का वडाअध्यक्ष किशोर पौडेलले घटनाको विषयमा आफुलाई जानकारी भएको बताउनु भयो । उहाँले दोषीलाई कानून वमोजिम कार्वाहि हुनु पर्ने र मजदुरलाई काम फर्काउनु पर्ने बताउनु भयो । वडाअध्यक्ष पौडेलले पीडकलाई प्रहरीले पक्राउ गरेकै विषयमा स्थानीय मजदुर निकालेर भारतीय मजदुरमात्र उद्योगमा राख्नु जायज नभएको बताउनु भयो । यो उद्योग सन्तोष उप्रेती, मिलन काफ्ले लगायतको टिमले सञ्चालन गर्दै आएको छ ।
