बिर्तामोड, १३ भदौ : झापाको बिर्तामोड नगरपालिका–२ स्थित ड्रिमल्याण्ड पार्कभित्रको स्वीमिङ पुलमा एक युवा व्यवसायीको शंकास्पद मृत्यु भएको छ । बिर्तामोड ३ निवासी ३३ वर्षीय प्रकाश प्रसाईँ शुक्रबार बेलुका मृत अवस्थामा फेला परेका हुन् ।
प्रसाईँ ओमकार रेडिमिक्स र बुलडक्स पेवर्सका सञ्चालक समेत हुन् । उनी साथी बिर्तामोड १० का केशव शिवाकोटीसँग दिउँसो करिब ३ बजे पार्कमा पुगेका थिए । पौडी खेल्ने क्रममा मृत्यु भएको भन्दै पार्क सञ्चालक जीवन ढुङ्गानाले राति ८ बजे प्रहरीलाई खबर गरेका थिए ।
घटनापछि इलाका प्रहरी कार्यालय अनारमनीको टोलीले अनुसन्धान सुरु गरेको जिल्ला प्रहरी कार्यालय झापाका प्रवक्ता डिएसपी खगेन्द्रबहादुर खड्काले जानकारी दिनुभयो । प्रारम्भिक अनुसन्धान जारी रहे पनि घटनाको प्रकृति शंकास्पद भएको परिवारको दाबी छ ।
साढे ३ फिट मात्र गहिराइ भएको पुलमा पौडी खेल्न जान्ने व्यक्तिको मृत्यु हुनु, सो समयमा हेरालु रहँदा पनि कसैले नदेख्नु, तत्काल प्रहरीलाई नभई ढिलो गरी खबर गरिएको जस्ता विषयले परिवारलाई शंका थपिएको छ ।
घटना शंकास्पद भएको भन्दै परिवारले शवलाई पोष्टमार्टमका लागि धरान पठाएको छ । परिवारका सदस्यका अनुसार प्रसाईँको मृत्यु प्राकृतिक नभई नियोजित हुनसक्ने सम्भावना छ ।
प्रहरीले घटनामा संलग्न हुनसक्ने आशंकामा एक जनालाई नियन्त्रणमा लिएको छ । घटनाबारे विस्तृत अनुसन्धान भइरहेको प्रहरीले जनाएको छ ।
