बिर्तामोड, २६ असोज : प्रहरी महानिरीक्षक चन्द्रकुवेर खापुङगले बिर्तामोडस्थित इलाका प्रहरी र ट्राफिक प्रहरीको कार्यालय अवलोकन गर्नु भएको छ । उहाँले आज विहान दुवै कार्यालयको अवलोकन गर्नु भएको हो ।
भदौ २४ गते भएको जेनजी आन्दोलनका क्रममा इलाका र ट्राफिक कार्यालय आगजनी भएको थियो । समुदायस्तरबाट निर्मित कार्यालयहरुको अवलोकन गर्दै प्रहरी महानिरीक्षक खापुङ्गले यहाँका सचेत नागरिकको योगदानप्रति धन्यवाद दिनुभयो ।
प्रहरी महानिरीक्षक खापुङ्गले कार्यालय निर्माणमा सहयोग गरेको समाजले प्रहरीको आवश्यकता महसुस गरेरै काम गरेको बताउनुभयो । उहाँले प्रहरीसँग समाजको ठुलो अपेक्षा रहेकोले
समाजप्रतिको दायित्व पुरा गर्नुपर्ने बताउनु भयो ।
अवलोकनका क्रममा खापुङ्गले मातहतका प्रहरीलाई उच्च मनोवल बनाएर काम गर्न निर्देशन दिनुभयो । प्रहरीमाथि भएको आक्रमण अपराधीहरुले गरेको भन्दै उहाँले अपराध कर्ममा लाग्नेहरु ढिलोछिटो कानुनी दायरामा आउने स्पष्ट पार्नुभयो ।
सो क्रममा कार्यालय निर्माणमा अगुवाई गर्ने युवा व्यवसायी पदम श्रेष्ठले समुदायस्तरबाट भएको काम कारबाहीको बारेमा जानकारी गराउनु भएको थियो । खापुङले बिर्तामोडको अवलोकनपछि इप्रका दमकको पनि अवलोकन गर्नु भएको छ ।
अनुगमनमा कोशी प्रदेश प्रहरी प्रमुख प्रहरी नायव महानीरिक्षक इश्वर कार्की लगायत प्रहरी अधिकृतहरुपनि सहभागि हुनुहुन्थ्यो ।
