बिर्तामोड, २० कात्तिक : नेकपा एमाले बिर्तामोड नगर कमिटीले बिर्तामोड नगरपालिकामा परेका विकास योजनाहरु तत्काल कार्यान्वयन गर्न सरकारसंग माग गरेको छ ।
एमाले नगर कमिटीले आज विशेष पत्रकार सम्मेलनको आयोजना गर्दै भदौ २३ र २४ गते भएको जेन-जी आन्दोन पछि बनेको शुसिला कार्की नेतृत्वको सरकारले अघिल्लो सरकारले रातो किताबमा समावेश योजना कटौती गरेको भन्दै यसलाई रोक्न माग गरेको हो ।
नगर कमिटी अध्यक्ष सुवास भट्टराईले काटिएका योजनाहरुको विवरण प्रस्तुत गर्नु भयो । उहाँका अनुसार ५० करोड भन्दा बढीका योजनाहरु काटिएका छन् ।
काटिएका योजनाहरुमा भौतिक पूर्वाधार तथा यातायात मन्त्रालय अन्तर्गत बिर्तामोड- रिङरोड निर्माण ४ करोड, बिर्तामोड-गोलधाप-सुन्दरपुर सडक (वडा नम्बर १०) ३ करोड, शहीद नेत्रमार्ग (वडा नम्बर ९) ४ करोड, सैनिकमोड-तेलकानी पोखरी जाने सडक (वडा नम्बर ३ र १०) ३ करोड, जिराइतटोल सडक स्तरोन्नति (वडा नम्बर ५) ३ करोड, झापा-मिनाचोक उखुबारी भुतेनी पूल भवानीमार्ग (वडा नम्बर १०) ३ करोड, झापा क्षेत्र नम्बर २ चक्रपथ स्तरोन्नति (बिर्तामोड खण्ड) ८ करोड गरी २८ करोड रुपैयाँ रहेको छ ।
यस्तै सहरी विकास मन्त्रालय अन्तर्गतका योजनाहरु हर्चना पूल उत्तर खोलामा ७ कि.मी तटवन्ध ३ करोड, सैनिकमोड-तेलकानी पोखरी जाने सडक ३ करोड, डिजाइनर फर्निचर दक्षिण प्रकाश उप्रेतीको घरबाट पूर्व रुद्र बोर्डिङ हुँदै बसपार्क जोड्ने सडक ३ करोड, मोहनमाया माध्यमिक विद्यालय भवन निर्माण ३ करोड,
देउनियाँबाट घैलाडुब्बा जोड्ने सडक (वडा नम्बर ८) ३ करोड, देउनियाँ पूल दक्षिण मसले टोल हुँदै बिर्तामोड ७ जोड्ने सडक निर्माणमा ३ करोड, मण्डामार्ग कालोपत्रेका लागि विनियोजित ३ करोडसहित दर्जनौं योजनाहरु काटिएका छन् ।
एमाले बिर्तामोडले कात्तिक महिनामा परेको बेमौषमी वर्षातका कारण सयौं विगाहामा लगाइएको पाक्न लागेको धानबालीमा धेरै क्षति पुगेकोमा दुःख ब्यक्त गर्दै तीनै तहका सरकारहरुलाई उचित क्षतिपूर्तिको प्रबन्ध गर्न समेत माग गरेको छ ।
यसैवीच अध्यक्ष भट्टराईले जेन-जी आन्दोलका क्रममा भएको सरकारी, नीजि तथा सार्वजनिक सम्पत्तीको क्षतिको विवरण संकलन गरी क्षतिपूर्ती प्रदान गर्न र दोषीलाई तत्काल पक्राउ गरी कार्बाही गर्न माग गर्नुभयो ।
पत्रकार सम्मेलनमा राष्ट्रिय सभाका पूर्वसदस्य हरिचरण शिवाकोटी, बिर्तामोड नगर प्रमुख पवित्रा महतारा प्रसाई, उपप्रमुख नगेन्द्र प्रसाद संग्रौला, वडा नम्बर ३ का वडाअध्यक्ष मदन बुढाथोकी, एमाले केन्द्रिय सदस्य अमृतलाल राजवंशी, बिर्तामोड नगरकमिटी इन्चार्ज अम्बिर लिङ्देन, एमाले नेताहरु छवि विश्वकर्मा, प्रविन पोख्रेल, पवित्रा पाठक लगायतको उपस्थिति रहेको थियो ।
