काठमाडौँ, १९ पुसः नेपाल कम्युनिष्ट पार्टी (एमाले) को जनसङ्गठन ‘राष्ट्रिय जनसांस्कृतिक महासङ्घ, नेपाल’ ले आज आफ्नो ३९औँ स्थापना दिवस मनाएको छ ।
कार्यक्रममा एमाले उपाध्यक्ष रघुजी पन्तले सूचना प्रविधि सिर्जनशीलताका लागि अवसरका साथै चुनौतीका रूपमा पनि रहेको बताउँदै समाजबाटै प्राप्त हुने मानवीय अनुभूति ग्रहण गरेर वैचारिक अभियानमा लाग्न आग्रह गर्नुभयो । पूर्वमन्त्री पन्तले महासङ्घले पुराना स्रष्टाको सम्मान गर्दै नयाँ पुस्तासम्म पुग्नुपर्ने र उनीहरूलाई समेटेर वैचारिक एवम् उद्देश्यमूलक यात्रामा लाग्नुपर्नेमा जोड दिनुभयो ।
कार्यक्रममा बूढानीलकण्ठ नगरपालिकाका उपप्रमुख अनिता लामाले सांस्कृतिक रूपान्तरणमा चेतना वा विचार निर्माण अत्यन्त आवश्यक रहेकाले यसका लागि महासङ्घले समर्पित भएर लाग्न स्रष्टालाई प्रेरणा दिँदै आएको बताउनुभयो । एमालेका केन्द्रीय सदस्य सुजिता शाक्यले संस्कृतिमाथि निरन्तर प्रहार भइरहेको वर्तमानमा संस्कृतिकर्मीको विशेष भूमिका रहेको औँल्याउनुभयो ।
एमालेका अर्का केन्द्रीय सदस्य हेमराज राईले परिवर्तनलाई सम्बोधन गर्ने नयाँ सशक्त रचना सिर्जनामा लाग्न आग्रह गर्नुभयो । कार्यक्रममा नन्दु उप्रेतीले समसामयिक कविता वाचन गर्नुभएको थियो भने भरत नेपाली र सूर्य मगरले सारङ्गीको धुन सुनाउनुभएको थियो ।
महासङ्घका कार्यवाहक अध्यक्ष अशोककुमार राईले सार्थक सृजनाका साथै सिद्धान्त र व्यवहारका बीच तालमेल गर्नुपर्ने तथा साङ्गठनिक समन्वय गरिनुपर्ने आवश्यकतामा जोड दिनुभयो ।
विसं २०४४ पुस १९ मा डा मोदनाथ प्रश्रितको अध्यक्षतामा गठित तत्कालीन ‘राष्ट्रिय जनसांस्कृतिक मञ्च’ हाल महासङ्घका रूपमा सक्रिय रहेको छ ।
