शिवसताक्षी, २५ पुस। झापा स्थित शिवसताक्षी नगरपालिकाले विभिन्न १३ विधामा नगरका ५८ जना शिक्षक, विद्यालय कर्मचारी तथा उत्कृष्ट विद्यार्थीहरुलाई सम्मान गरेको छ ।
नगरपालिकाले आज शिवसताक्षीको दुधेमा आयोजना गरिएको कार्यक्रममा दीर्घसेवी शिक्षक, अवकाश प्राप्त तथा पूर्व प्रधानाध्यापक, बाल शिक्षक र विभिन्न तहमा उत्कृष्ट नतिजा हासिल गर्ने विद्यार्थीहरुलाई सम्मान गरिएको हो ।
कार्यक्रममा सामुदायिक विद्यालयहरुबाट माध्यमिक तहतर्फ भानु माध्यमिक विद्यालय, आधारभूत तहमा दिपेन्द्र आधारभूत विद्यालय र आधारभूत तह (१–५) तर्फबाट अरुणोदय प्राथमिक विद्यालय उत्कृष्ट विद्यालयका रुपमा सम्मानित भएका छन् ।
त्यस्तै, संस्थागत विद्यालयतर्फ दिक्षान्त शिक्षा निकेतन माध्यमिक विद्यालयलाई उत्कृष्ट विद्यालयको रुपमा सम्मान गरिएको शिवसताक्षी नगरपालिका शिक्षा अधिकृत छवि ढकालले जानकारी दिनुभयो ।
नगरपालिकाले उत्कृष्ट प्रधानाध्यापकका रुपमा डामकुमार कुँवर, महेश कुमार खड्का र ताराकुमारी लावतीलाई सम्मान गरेको छ ।
यसैगरी २ जना दीर्घसेवी शिक्षक, २४ जना पूर्व प्रधानाध्यापक, ७ जना अवकाश प्राप्त शिक्षक, ४ जना अवकाश प्राप्त विद्यालय कर्मचारी तथा २ जना बाल शिक्षकहरु सम्मानित हुनुभएको छ ।
सम्मानित बालशिक्षक र कर्मचारी गरी ६ जनालाई यसअघि नगरपालिकाले उपदान स्वरुप जनही एक लाख रुपैयाँ प्रदान गरिसकेको जनाएको छ ।
कार्यक्रममा शैक्षिक सत्र २०८१ मा कक्षा ८, एसईई तथा कक्षा १२ मा उत्कृष्ट जिपिए ल्याउने १६ जना विद्यार्थीलाई नगदसहित सम्मान गरिएको थियो । नगरभरिबाट छनोट गरिएका ती विद्यार्थीहरुलाई उत्कृष्ट विद्यार्थीको रुपमा सम्मान गरिएको नगरपालिका जनाएको छ ।
कार्यक्रममा नगरप्रमुख मेगाहाङ्ग थोप्राले शिक्षक पेशालाई समाजले सधैं सम्मानित र प्रतिष्ठित पेशाका रुपमा हेर्दै आएको उल्लेख गर्नुभयो । शिक्षकहरुले विद्यालय मात्र होइन समाज र राष्ट्र निर्माणमा दिएको योगदान अत्यन्त महत्वपूर्ण रहेको बताउँदै उहाँहरुलाई सम्मान गर्न पाउँदा नगरपालिकालाई गर्व लागेको उहाँको भनाइ थियो । सीमित स्रोत–साधनका बाबजुद पनि शिक्षाको गुणस्तर सुधार र भौतिक पूर्वाधार विकासका लागि नगरपालिका निरन्तर प्रयासरत रहेको नगरप्रमुख थोप्राले बताउनुभयो ।
कार्यक्रममा शिक्षक महासंघ शिवसताक्षीका अध्यक्ष बेनुप्रसाद कार्की, पूर्व प्रधानाध्यापक कालीप्रसाद रिजाललगायतले शुभकामना मन्तव्य व्यक्त गर्नुभएको थियो । शिक्षा अधिकृत छवि ढकालको अध्यक्षतामा सम्पन्न कार्यक्रमको सञ्चालन शिक्षक कमल भट्टराईले गर्नुभएको थियो ।
