बिर्तामोड, २ फागुन : झापा क्षेत्र नं. २ मा नेकपा एमालेले २५ वटै वडामा निर्वाचन परिचालन समिति गठन गरेको छ । शनिवार अर्जुनधारा २ मा वडास्तरीय परिचालन समिति घोषणा गर्दै क्षेत्रको सबै वडामा समिति घोषणा सम्पन्न भएको जनाएको छ ।
पार्टीका नेता कार्यकर्ताको भेटघाटलाई तीब्रता दिएको एमालेले वडावडामा एमालेको परिचालन समिति बनाएर निर्वाचन प्रचारप्रसारलाई गति दिएको परिचालन समितिका संयोजक एकराज कार्कीले जानकारी दिए । उनका अनुसार वडावडामा एमाले एकढिक्का भएर चुनावमा होमिएको छ । अर्जुनधारा २ को भेलालाई सम्बोधन गर्दै संयोजक कार्कीले एमाले एक ढिक्का गरेर जाने निर्णय गरेको जानकारी दिए ।
कार्कीले क्षेत्रमा वडास्तरीय परिचालन घोषणाका क्रममा सबैले एमाले एक ढिक्का हुने र पार्टीको उम्मेदवार देवराज घिमिरेलाई विजयी गराउने दृढ संकल्प गरिएको जनाए । वडा तहको कार्यक्रममा उनले अरुसँग प्रतिष्पर्धा गर्ने समयमा आन्तरिक एकतालाई बलियो बनाउनुको विकल्प नरहेको बताएका छन् ।
फागुन २१ को निर्वाचन विकाससँगै राष्ट्र जोगाउने सवाल भएको औल्याउदै उनले मतदाताहरुलाई सोही अनुसार सहजीकरण गर्न आग्रह गरेका छन् । सामाजिक एवम् राजनीतिक क्षेत्रमा उमेर भन्दा पनि लगनशिलता र भिजन अनिवार्य हुनुपर्ने उनको धारणा छ ।
निर्वाचन परिचालन समिति घोषणा कार्यक्रममा बोल्दै उम्मेदवार देवराज घिमिरेले झापा २ मा मतदातासँग मन जितेर मत माग्ने हक भएको बताए । उनले ५ वर्षका लागि मतदान गरेको भन्दै थालेको काम पूरा गर्नुपर्ने दायित्व आफूसँग भएको बताएका छन् । अघिल्लो पकट यसै क्षेत्रका मतदाताको मतबाट विजयी भएको बताउदै उनले यस क्षेत्रमा अरबौं रुपैयाँको बजेट ल्याएर विकासको काम गरेको अवगत गराए ।
उनले भने – धेरै काम सम्पन्न भएको छ, धेरै काम निर्माणको चरणमा छ । त्यसलाई पूरा गर्न पनि २ नं. क्षेत्रमा मतदाताले निर्वाचित गराउनेमा विश्वास लिएको छु ।
कोशी प्रदेशका मन्त्री चिन्तन पाठकले घिमिरे विजयी हुँदा जनताका समस्या सिधा सम्पर्क गरेर राख्न सकिने धारणा व्यक्त गरे । पहिले पनि सिधा सम्पर्क गरेर क्षेत्रका लागि काम गरियो, फेरि पनि गर्न सक्छौं, उनले थपे ।
कार्यक्रममा सहभागीहरुले अनुशासित र सालिन उम्मेदवार पाएको प्रतिक्रिया दिएका छन् । अधिकांशले घिमिरेले क्षेत्रमा धेरै विकास योजनाहरु ल्याएको बताएका छन् । उनीहरुले स्थानीय समस्याहरु समेत राखेका थिए ।
