मुस्ताङ, ३ फागुन ।आगामी फागुन २१ गते हुन लागेको प्रतिनिधिसभा सदस्य निर्वाचन सुरक्षालाई लक्षितगरी उपल्लो मुस्ताङको लोमान्थाङ गाउँपालिकामा सुरक्षा निकायले संयुक्त गस्ती सुरू गरेका छन् ।
छिमेकी देश चीनको तिब्वतसँग सिमाना जोडिएको अति संवेदनशील क्षेत्रसहित मतदान केन्द्रमा नेपाल प्रहरी, नेपाली सेना (इन्द्र बक्स गण) र सशस्त्र प्रहरी बिओपीको संयुक्त गस्ती गरेको हो । लोमान्थाङ गाउँपालिका वडा नम्बर १, २ र ४ बाट सुरू भएको संयुक्त गस्तीसँगै मतदान केन्द्रमा आवश्यक पर्ने पूर्वाधार मर्मतमा सुरक्षा निकायबाट सहयोग गरिएको छ ।
निर्वाचनलाई स्वस्छ, स्वतन्त्र, निष्पक्ष र भयरहित वातावरण बनाउन एकीकृत निर्वाचन सुरक्षा योजनाअनुसार जिल्लाका पाँचवटै स्थानीय तहको बजारदेखि गाउँसम्म आवश्यकताअनुसार गस्ती गरिने प्रमुख जिल्ला अधिकारी अजिता शर्माले बताउनुभयो ।
प्रजिअ शर्माले भन्नुभयो, ‘‘समुदायस्तरमा नियमित गस्तीसहित समन्वय भइरहेको छ, मुस्ताङ जोड्ने सीमा क्षेत्रमा आवश्यकताअनुसार गस्तीलाई प्राथमिकता दिएका छौं ।’’ उपल्लो मुस्ताङको लोमान्थाङ गाउँपालिका थुर्लुङ फाँट र सदरमुकाम जोमसोममा इन्द्रबक्स गण र सशस्त्र प्रहरी बलको लोघेकर दामोदरकुण्ड गाउँपालिका–१, चराङस्थित गाउँपालिकामा बेस र लोमान्थाङ गाउँपालिकाको छोसेरमा रहेको सशस्त्र प्रहरी बल नेपाल (बिओपी) रहेको छ ।
जिल्लामा नेपाली सेना, नेपाल प्रहरी, शसस्त्र प्रहरी बल र राष्ट्रि«य अनुसन्धानले समन्वय र सहकार्यमा सुरक्षाको पूर्ण प्रत्याभूति दिलाउनेगरी निर्वाचन केन्द्रित गतिविधि भइरहेको छ । निर्वाचनमा पहिलो घेरामा नेपाल प्रहरी, निर्वाचन प्रहरी, दोस्रो घेरामा शसस्त्र प्रहरी बल नेपाल र तेस्रो घेराको सुरक्षा नेपाली सेनाले गर्नेछ ।
संवेदनशील क्षेत्र तथा महत्वपूर्ण पूर्वाधारहरुको सुरक्षा, निर्वाचन अवधिभर उत्पन्न हुनसक्ने आपतकालीन अवस्थामा शीघ्र प्रतिक्रिया, निर्वाचन सामग्रीहरुको सुरक्षा र सम्भावित जोखिम न्यूनीकरणमा नेपाली सेनाको कमाण्ड हुनेछ । मतदाताको निर्वाध आवागमनमा सुनिश्चित्तासहित उपल्लो मुस्ताङमा हिमपातले अवरुद्ध भएका सहायक सडकको मर्मतमा समेत सुरक्षा समितिले प्राथमिकता दिएको छ ।
मुस्ताङमा नेपाली कांग्रेसबाट योगेश गौचन थकाली, नेकपा (एमाले) का इन्द्रधारा डाढु विष्ट, नेपाली कम्युनिष्ट पार्टीबाट ङुटुक गुरूङ र राष्ट्रि«य स्वतन्त्र पार्टीबाट अधितियचन्द्र थकाली, आम जनता पार्टीबाट अजय विक, मंगोल नेशनल अर्गनाइजेशनबाट यमबहादुर गुरूङ, राष्ट्रि«य प्रजातन्त्र पार्टीबाट कमला लालचन र उज्यालो पार्टीबाट डा. सुरेन्द्र शेरचन उम्मेदवार हुनुहुन्छ ।
एक निर्वाचन क्षेत्र रहेको जिल्लामा थासाङ, घरपझोङ, बाराजुङ मुक्तिक्षेत्र, लो घेकर दामोदरकुण्ड र लोमन्थाङ गाउँपालिकामा ३९ मतदानस्थलमा कुल ११ हजार ३ सय २८ मतदाता रहेका छन् ।
