बिर्तामोड : झापाको बिर्तामोडस्थित डोमालाल राजवंशी रंगशालामा जारी सन्थाल गोल्डकपमा आयोजक सन्थाल जाति उत्थान सेवा समाज बिर्तामोड शानदार प्रदर्शन गर्दै सेमिफाइनलमा स्थान पक्का गरेको छ ।
मंगलवार भएको खेलमा आयोजक टिमले मोरङ सन्थाल क्लवलाई ७–१ गोल अन्तरले स्तब्ध बनाउँदै अन्तिम चारमा प्रवेश गरेको हो । खेलभरि आक्रामक देखिएको आयोजक टिमले मोरङमाथि पूर्ण नियन्त्रण जमाएको थियो ।
आयोजक टिमको तर्फबाट श्याम मुर्मुले ३ गोल योगदान गरेका थिए । उनले २०, ३७ र ५२ औं मिनेटमा गोल गरेका थिए । यस्तै रोहित हेमरमले १८ र ३४ मिनेटमा गोल गरेका थिए । बाँकी २ गोल आत्मघाती भएको थियो । विपक्षी मोरङ सन्थाल क्लवले सान्तवना १ गोल फर्काएको थियो ।
आयोजक टिमका तर्फबाट ३ गोल गर्ने श्याम मुर्मु ‘म्यान अफ द म्याच’ घोषित भए, उनले नगद १५ सय रुपैयाँ प्राप्त गरे ।
सन्थाल जाति उत्थान सेवा समाज बिर्तामोड–६ द्वारा आयोजित प्रतियोगितामा बिर्तामोड नगरपालिका मुख्य संरक्षकका रूपमा रहेको छ भने भद्रपुर झापा गोल्डकप र वडा नं. ६ सह–प्रायोजक रहेका छन् ।
चैत २८ गतेसम्म सञ्चालन हुने प्रतियोगिताको विजेताले १ लाख रुपैयाँसहित ट्रफी, मेडल प्राप्त गर्नेछ भने उपविजेताले ६० हजार रुपैयाँमा चित्त बुझाउनुपर्नेछ ।
बुधबार हुने पहिलो सेमिफाइनल खेल हात्तीमारा र हल्दिवारीबीच कडा प्रतिस्पर्धा हुने कार्यक्रम संयोजक टिका हस्दाले जानकारी दिए ।
