बिर्तामोड, ७ वैशाख । जिल्ला प्रहरी कार्यालय झापामा गम्भीर प्रकृतिका ६९ सहित २०६ वटा मुद्दा दर्ता भएका छन् । झापा प्रहरीका अनुसार २०८२ चैत महिनामा सामान्य ३१, जघन्य १६ वटा मुद्दा दर्ता भएको छ । ४३ वटा दुई वर्षे रहेका छन् ।
महिला बालकालिका तथा ज्येष्ठ नागरिक विरुद्ध २१ वटा मुद्दा दर्ता भएको झापा प्रहरीले जनाएको छ । यस्तै, आर्थिक अपराध तर्फ बैंकिङ कसुरमा ३७, ठगी ७ र आर्थिक लाभका ३ वटा मुद्दा दर्ता भएका छन् । प्रहरीले ३ सय जना प्रतिवादी र फरार प्रतिवादी पक्राउ गरेको जनाएको छ । फैसला कार्यान्वयन तर्फ फरार १८७ जना पक्राउ गर्दै ४८ लाख ४६ हजार ८ सय ४३ रुपैयाँ नगद जरिवाना गरेको छ ।
चैत महिनामा मुख्य फरार प्रतिवादी ८ जनालाई पक्राउ गरिएको जिल्ला प्रहरी कार्यालय झापाले जनाएको छ । वैदेशिक रोजगार कुसरमा छविलाल घिमिरे, बैंकिङ कसुरमा मुकेशमान तामाङ, सवारी ज्यान कसुरमा दिल कुमार थामी, चोरी कसुरमा असल तामाङ, बलदेव थापा, सुरज थापा, नेपाली नागरिकता किर्तेमा फरार भवकृष्ण न्यौपाने र अजय कार्कीलाई पक्राउ गरिएको जिल्ला प्रहरी कार्यालय झापाले जनाएको छ ।
चैत महिनामा घरेलु हिंसामा ७ वटा उजुरी परेको प्रहरीले जनाएको छ । सो अवधिमा बालबालिकासहित ६५ जना मानिस हराएकोमा प्रहरीले ५१ जनालाई फेला पारेको जनाएको छ ।
झापा प्रहरीका अनुसार शारिरीक मानसिक यातनाका २, पारिवारिक कलहका २ र मादक पदार्थ सेवन गरी घरेलु हिंसाका ३ वटा उजुरी परेको विवरण सार्वजनिक गरेको छ ।
प्रहरीमा प्रत्यक्ष रुपमा २२४ र जिल्ला प्रशासन मार्फत ८५ वटा उजुरी परेको जिल्ला प्रहरी कार्यालय झापाले जनाएको छ ।
५६० ग्राम ब्राउनसुगर
चैत महिनामा मात्र झापा प्रहरीले ५६० ग्राम ब्राउनसुगरसहित ६६ जनालाई पक्राउ गरेको छ । ब्राउन सुगरका कारोवारी, प्रयोगकर्ताहरुबाट प्रहरीले ४ वटा मोटरसाइकल, स्कुटर र अटो १-१ वटा नियन्त्रणमा लिएको थियो । यस्तै, प्रहरीले ८५२ ग्राम गाँजा र ३०५ क्याप्सुल बरामद गरेको थियो ।
विपद तर्फ ४६ वटा घटना भएको झापा प्रहरीले जानकारी दिएको छ । त्यसमा आगलागी १८, जंगली जनावरको आक्रमण ३ र हावाहुरीबाट २५ वटा घटना भएका छन् । विपदमा १ करोड ८० लाख ३२ हजार ७५० रुपैयाँ बराबरको क्षति भएको झापा प्रहरीले जनाएको छ ।
