काठमाडौँ, १४ साउन: नेपाली कम्युनिष्ट पार्टी (नेकपा) संसदीय दलका नेता एवं पूर्वप्रधानमन्त्री पुष्पकमल दाहालले नेपाली जनताको ऐतिहासिक विरासत भनेको सामाजिक सद्भाव कायम राख्नु भएकाले संवाद र सहमतिबाट समस्याको समाधान गरिनुपर्नेमा जोड दिनुभएको छ ।
प्रतिनिधिसभाको आजको बैठकमा विशेष समय लिएर बोल्नुहुँदै उहाँले सुनसरीको परिस्थिति असहज हुन दिन नहुने र त्यसका लागि सबै पक्षले सामाजिक सद्भावलाई महत्व दिएर अघि बढ्नुपर्ने बताउनुभयो । नेता दाहालले सुनसरीको कप्तानगञ्जमा गोली चलाउनु पर्ने अवस्था थियो वा थिएन भन्ने विषय पनि सत्यतथ्य बाहिर आउनुपर्ने धारणा व्यक्त गर्नुभयो ।
प्रचलित संविधान, कानुन र व्यवहारअनुसार यस किसिमका घटनाको समाधान तथा व्यवस्थापन गर्ने कामको नेतृत्व प्रधानमन्त्रीबाट हुनुपर्ने धारणा व्यक्त गर्नुहुँदै उहाँले राष्ट्रिय स्वतन्त्र पार्टीले बुधबार बोलाएको सर्वदलीय बैठकलाई भने सकारात्मक कदमका रूपमा लिनुपर्ने बताउनुभयो ।
अहिलेको असहज अवस्थामा पनि संवाद र सहकार्य हुन आवश्यक छ भन्नुहुँदै पूर्वप्रधानमन्त्री दाहालले सरकारको नेतृत्वमा प्रमुख राजनीतिक पार्टीहरूबीचको एकता र सहकार्यबाट संवेदनशील समस्याको समाधान खोजिनुपर्ने धारणा व्यक्त गर्नुभयो ।
उहाँले सुकुम्बासी, ट्रेड युनियन, विद्यार्थी सङ्गठन, सीमा विवादसम्बन्धी विषयमा वर्तमान सरकारबाट राम्रो काम नभएको उल्लेख गर्नुहुँदै संविधान संशोधनका विषयमा सरकार जसरी प्रस्तुत भयो, त्यसले संविधानलाई कमजोर बनाउन लागेको त होइन भन्ने प्रश्न आमजनतामा देखिएको भनी सरकारको ध्यानाकषर्ण गनुभयो ।
पूर्वप्रधानमन्त्री दाहालले नेपाली जनताको लोकतान्त्रिक अधिकारका लागि पछिल्लो समय भइरहेका केही घटनाक्रमले सही सङ्केत नगरेको टिप्पणी गर्नुभयो । गणतन्त्र दिवसका दिन प्रधानमन्त्रीले नबोल्नु, संसद्को संयुक्त बैठकमा राष्ट्रपतिले सरकारको नीति तथा कार्यक्रम वाचन गरिरहेका समयमा प्रधानमन्त्री उठेर हिड्नु र सीमाका विषयमा प्रधानमन्त्रीले संसद्मा बोलेको विषयलाई लोकतान्त्रिक शासन प्रणालीमा राम्रो मान्न नसकिने धारणा व्यक्त गर्नुभयो ।
“लोकतन्त्रप्रतिको निष्ठा र राष्ट्रप्रतिको जिम्मेवारीका पक्षमा हामी सबै सांसदले भूमिका निर्वाह गर्नुपर्छ, प्रधानमन्त्री बालेन्द्र शाहलाई भन्छु, ठूला समस्याको निकास दिने जेल–नेल भोगेका नेता मुलुकमा छन्, तीसँग सहकार्य गर्न प्रधानमन्त्रीलाई के ले रोकेको हो, नेपालको राष्ट्रिय स्वाधीनताको रक्षाका निमित्त एकताबद्ध हुन जरुरी छ, प्रधानमन्त्रीका कतिपय अभिव्यक्तिले अप्ठ्यारो बनाएको छ । सहज परिस्थिति निर्माण गर्न उहाँले संसद्मा स्पष्टीकरण दिनुपर्छ, उहाँले भन्नुभयो ।
विगतमा शान्ति प्रक्रियाका क्रममा निर्वाह गरेको भूमिकाको चर्चा गर्नुहुँदै पूर्वप्रधानमन्त्री दाहालले त्यस अनुरुप अहिलेका दलले पनि पाठ सिक्नुपर्ने बताउनुभयो । उहाँले २०७२ वैशाख १२ गतेको ‘गोर्खा’ भूकम्प आएको बेला तत्कालीन नेकपा माओवादी प्रतिपक्षी दल भएपनि विपदको समयमा सरकारसँग सहकार्य गरी राहत, उद्धार र पुनःस्थापनाका काममा सक्रिय रूपमा सहभागी भएको स्मरण गर्नुभयो ।
नेपाली जनताका बीच राष्ट्रिय एकता र सामाजिक सद्भाव कायम गरी नेपाललाई स्वतन्त्र, सुदृढ र सम्पन्न मुलुक बनाउने अभियानमा अहिले सत्तारुढ दल रास्वपाको महत्वपूर्ण भूमिका हुने धारणा व्यक्त गर्नुहुँदै नेता दाहालले देशलाई अप्ठ्यारो परेको अवस्थामा यसअघि जस्तै आफ्नो पार्टी सहयोग र सहकार्य गर्न तयार रहेको स्पष्ट गर्नुभयो ।
