नेपालमा चिया रोपण सुरु भएको १६० वर्षपछि इलाममा पहिलो पटक चिया प्रविधिको पढाइ सुरु गरिएको छ । प्रमुख निर्यातयोग्य वस्तु मानिएको नेपाली चियाको क्षेत्रमा यो विषयको अध्ययन अध्यापन निकै महत्त्वपूर्ण मानिएको छ ।
अहिलेसम्म भारत र अन्य मुलुकमा गएर सिकेको सिपका भरमा नेपालीले तयारी चिया बनाउने गरेका छन् । यस वर्ष भने नेपालमै चिया प्राविधिकको पढाइ सुरु गरिएको इलामको साँखेजुङस्थित रत्नकुमार बान्तवा बहुप्राविधिक शिक्षालयका प्रमुख दीपक खनालले बताउनु भयो । खनालका अनुसार देशभरका ४० जना विद्यार्थीले पहिलो पटक यो शिक्षालयमा चिया प्रविधि पढ्दै छन् ।
चिया प्रविधि प्री डिप्लोमा तह (अप्रेन्टिसिप मोडालिटी)मा रहेर चिया प्रविधिसम्बन्धी कक्षा सुरु गरिएको शिक्षालयका प्रमुख खनालले जानकारी दिनुभयो । चिया प्रविधि पढाइका लागि दुईवर्षे पाठ्यक्रम भने यसअघि नै स्वीकृत भइसकेको थियो ।
