बिर्तामोड, ०७ पुस । झापाको बिर्तामोड नगरपालिका वडा नम्बर ७ मा निशुल्क आँखा शिविर सम्पन्न भएको छ ।
७ नम्बर वडा कार्यालयको आयोजना तथा बिर्ता आई केयरको प्राविधिक सहयोगमा शुक्रबार जेष्ठ नागरिक भवन मिलडांडामा शिविर सम्पन्न भएको हो ।
शिविरमा १ सय ८२ जनाले सेवा लिएको बिर्ता आई केयरकी व्यवस्थापक गिता बस्नेतले जानकारी दिनु भयो । जसमध्ये २६ जना मोतियाबिन्दु र ११ जना आँखामा मासु पलाएका बिरामी फेला परेका छन् ।
शिविरमा आई केयरले निशुल्क जाँच गर्नुका साथै आवश्यक औषधी तथा विपन्नहरुलाई चश्मा पनि निशुल्क वितरण गरेको छ ।ब्यवस्थापक बस्नेतका अनुसार शिबिरमा चेकजांच गराउने गरिब तथा विपन्नहरुको अप्रेशनसमेत आई केयरमा निशुल्क हुनेछ ।
वडा नम्बर ७ का वडाअध्यक्ष अबिरल कृष्ण खरेलले वडाबासीको स्वास्थ्यलाई ख्याल गर्दै आँखा शिविरको आयोजना गरिएको बताउनु भयो । वडाअध्यक्ष खरेलले यस आर्थिक वर्षमामात्रै ७ नम्बर वडामा २ पटक आँखा शिविर आयोजना गरीसकिएको जानकारी दिनुभयो ।
शिविरमा कार्यपालिका सदस्य लक्षिमा खतिवडा, वडासदस्य लता विश्वकर्मा, स्थानीय समाजसेवी युवा गणेश कोईराला लगायत आवश्यक व्यवस्थापनमा जुट्नु भएको थियो ।
शिविर फलदायी भएकोले आगामी दिनमासमेत विभिन्न प्रकारका स्वास्थ्य शिविरको आयोजना गरिने वडाअध्यक्ष खरेलले बताउनु भयो ।
