झापा, २२ असारः प्रेस काउन्सिल नेपालका अध्यक्ष बालकृष्ण बस्नेतले तथ्यलाई बेवास्ता गर्ने प्रवृत्तिले पत्रकारिता क्षेत्रमा विश्वसनीयता गुम्दै गएको बताउनुभएको छ । उहाँले गुमेको विश्वसनीयता फर्काउने कार्य चुनौतीपूर्ण रहेको बताउनुभयो ।
काउन्सिलले आज विर्तामोडमा आयोजना गरेको ‘नयाँ प्रविधिको माध्यमबाट उन्नत पत्रकारिता’ विषयक दुई दिवसीय तालिमको उद्घाटन कार्यक्रममा अध्यक्ष बस्नेतले उक्त धारणा व्यक्त गर्नुभएको हो । समाजलाई अग्रगति र रुपान्तरणको दिशामा लैजाने पत्रकारिताको विश्वसनीय खस्कँदै जानु चिन्ताको विषय भएको उहाँले बताउनुभयो ।
“तथ्य र प्रमाणले पुष्टि नगरी समाचार लेख्दै जाने हो भने पत्रकारितामाथिको विश्वसनीयता सिद्धिन्छ”, उहाँले भन्नुभयो, “पत्रकारिता कता गइरहेको छ भन्ने विषयमा आम पत्रकारहरू गम्भीर हुनपर्छ ।” पत्रकारितामा गुम्दै गएको साख फर्काउन काउन्सिलले देशव्यापी रूपमा आचारसंहिता पालनाका लागि जागरण अभियान चलाइरहेको उहाँले जानकारी दिनुभयो । आचारसंहिता उल्लङ्घन गर्ने सञ्चारमाध्यम र सञ्चारकर्मीलाई काउन्सिलले सचेत गराउँदै आएको बताउनुभयो ।
झापा, इलाम, मोरङ र सुनसरीका ४० भन्दा बढी महिला पत्रकार सहभागी रहेको उक्त तालिम आइतबार समापन हुने काउिन्सलका सदस्य गणेश पोखरेलले बताउनुभयो । आज पत्रकारितामा आर्टिफिसियल इन्टेलिजेन्सको प्रयोग र मल्टिमिडियाका लागि फोटो र भिडियो खिच्ने तरिकाका विषयमा प्रशिक्षक लीला भट्टराई र नसना श्रेष्ठले तालिम प्रदान गर्नुभएको थियो ।
