शिवसताक्षी, २६ मंसिर : शिवसताक्षी नगरपालिकामा ३३ औं लैंगिक हिंसा विरुद्ध १६ दिने अभियानका सम्पूर्ण कार्यक्रमहरु सम्पन्न भएका छन् ।
शिवसताक्षी नगरपालिका महिला तथा बालबालिका शाखाको आयोजनामा १६ दिने अभियानको आज वडा नं. ९ मा अभिमुखी कार्यक्रम गर्दै समापन गरिएको हो । कार्यक्रम मंसिर १० गतेबाट सुरु गरिएको शिवसताक्षी नगरपालिकाले जनाएको छ ।
कार्यक्रममा नगरप्रमुख मेगाहाङ्ग थोप्राले सरकारले वि.सं. २०७६ लाई लैंगिक हिंसा विरुद्ध अभियान वर्ष भनी घोषणा गरी विविध कार्यक्रमहरु गर्दै आएको बताए । उनले मानव अधिकारको विश्वव्यापी घोषणापत्र, १९४८ ले हरेक मानिसको ूस्वतन्त्रतापूर्वक जन्मन, हुर्कन र बाँच्न पाउने अधिकारको ग्यारेण्टी गरेको छ । उनले भने, लैंगिक विभेद आजको विश्वव्यापी समस्या हो र यो समस्याबाट खासगरी महिला तथा बालिकाहरु बढी पीडित हुने गरेका छन् । महिला हिंसा विरुद्ध सबै आ–आफ्नो घरबाटै लाग्न उनले सुझाब दिएका थिए ।
कार्यक्रममा शिवसताक्षी नगरपालिकाकी उपप्रमुख नरमाया कार्कीले महिला हिंसा विरुद्धको अभियानले यौन हिंसा र उत्पीडनको विरुद्ध महिलाहरूलाई आवाज उठाउन प्रेरित गरेको बताइन्। यस अभियानले लाखौँ महिलाहरूको अनुभवलाई साझा गर्यो र सँगै लिङ्गीय समानताको लागि लड्न प्रोत्साहित गरेको उनको भनाई छ। शिवसताक्षी नगरपालिका भित्रका महिलाहरु आफै जागरुप भएर कही कतै हिंसा भएको थाहा पाए र वा आफुलाई परे पनि सबै एक जुट भएर लड्न उपप्रमुख कार्कीले सुझाएकी थिइन् ।
महिला हिंसा विरुद्धको अभियानले समाजमा महिलाका अधिकार र सुरक्षाका लागि एउटा व्यापक र दीर्घकालीन परिवर्तन ल्याउनको लागि काम गर्ने शिवसताक्षी नगरपालिकाकी प्रशासकीय अधिकृत सुनिता तुम्बाहाङले बताइनु। यो अभियान मात्र महिलाहरूको प्रति सहानुभूति मात्र होइन, यसले मानवता र समानताको लागि एक गम्भीर संघर्षको रूपमा अघि बढ्नु आवश्यक भएको उनको भनाई छ ।
कार्यक्रममा अधिबक्ता हेम कला कट्टेल महिला हिंसा विरुद्ध अभियान र उद्देश्य, महिलाहरुले खेल्नु पर्ने भुमिकाको विषयमा अभिमुखीकरण गरेकी थिइन् । नगरपालिकाले ११ वटै वडामा अभियान चलाएको जनाएको छ।
महिला हिंसा विरुद्धको अभियानको समापन कार्यक्रम वडा नं. ९ का वडाध्यक्ष डिल्लाल फेम्बुको अध्यक्षता भएको थियो । शिवसताक्षी नगरपालिका महिला तथा बालबालिका शाखाकी प्रमुख देविना पराजुलीले स्वागत गरेको कार्यक्रमको सञ्चालन नगर स्तरीय महिला समिति उपाध्यक्ष कोपिला चम्लागाईले गरेकी थिइन् ।
