बिर्तामोड, २९ मंसिर : बिर्तामोड नगरपालिका वडा नम्बर १ मा निशुल्क स्वास्थ्य शिविर सम्पन्न भएको छ ।
नेकपा एमाले बिर्तामोड १ नम्बर वडा कमिटीले आज आयोजना गरेको एक दिने स्वास्थ्य शिविर सम्पन्न भएको हो । शिविरमा १२० जना भन्दा बढीले सेवा लिएको वडा कमिटी अध्यक्ष सुनिल शिवाकोटीले जानकारी दिनुभयो ।बिनोद मेडिकल स्टोर्स एण्ड क्लिनिकको संयोजन रहेको यस शिविरमा प्रयास मेडिकोले प्राविधिक सहयोग उपलव्ध गराएको थियो ।
ज्येष्ठ नागरिकका लागि लक्षित गरीएको शिविरमा प्रेसर, सुगर, दमका विरामीहरु धेरैले सेवा लिएको फिजिसियन डाक्टर प्रविन भट्टराईले जानकारी दिनु भयो । शिविरमा सेवा लिने सबैले औषधी र ल्याब सेवासमेत निशुल्क प्राप्त गरेका छन् ।
शिविर समापन कार्यक्रममा नगर प्रमुख पवित्रा महतारा प्रसाई, नेकपा एमाले बिर्तामोड नगर कमिटी अध्यक्ष सुभास भट्टराई लगायतको उपस्थिति रहेको थियो ।
