झापा, ८ माघ : बिर्तामोड अन्तराष्ट्रिय औद्योगिक व्यापार महोत्सव आजदेखि सुरु हुँदैछ ।
बिर्तामोड नगरपालिका ५ मा माघ १९ गतेसम्म सञ्चालन हुने महोत्सवको उद्घाटन कोशी प्रदेशका मुख्यमन्त्री हिक्मतकुमार कार्कीले गर्ने कार्यक्रम छ ।
महोत्सवलाई एपोलो पेन्टसले मुख्य प्रायोजन गरेको आयोजक संस्था बिर्तामोड उद्योग वाणिज्य संघका अध्यक्ष राजु न्यौपानेले जानकारी दिनुभयो । महोत्सवमा भारत, भुटान, वंगलादेश, पाकिस्तानसहित १५० वटा स्टलहरु रहनेछन्।
महोत्सवमा ज्येष्ठ नागरिक, अपाङ्गता भएका नागरिकलाई परिचय पत्रका आधारमा निःशुल्क प्रवेशको व्यवस्था गरिएको जनाइएको छ । त्यस्तै विद्यालय पोशाकमा महोत्सव अवलोकन गर्न आउने विद्यार्थीलाई पनि शिक्षकको रोहवरमा प्रवेश निःशुल्क गरिएको महासचिव कुशल खतिवडाले बताउनुभयो।
महोत्सवमा राष्ट्रिय स्तरका ख्यातिप्राप्त कलाकारहरुको साङ्गीतिक प्रस्तुति रहने छ । महोत्सव अवधिभर दुई लाख भन्दा बढी अबलोकनकर्ताले व्यापार महोत्सवको अवलोकन गर्ने अपेक्षा रहेको आयोजकले जनाएको छ ।
