झापा, ८ फागुनः झापाको बुद्धशान्ती–६ स्थित बाल्मिकी शिक्षा सदन विद्यालयले १७ औँ बार्षिकोत्सव मनाएको छ । आज (बिहीबार) विद्यालय परिसरमा बिबिध कार्यक्रमसँगै सांस्कृतिक कार्यक्रम गरेर बार्षिक उत्सव मनाइएको हो ।
कार्यक्रममा बोल्दै प्रमुख अतिथि तथा वडा नम्बर ६ का वडाअध्यक्ष शिवराज पौडेलले बाल्मिकी शिक्षा सदनले हरेक क्षेत्रमा विद्यार्थीलाइ पहिलो प्राथमिकतामा राखेर कार्य गर्दै आएको बताउनु भयो । उहाँले यस्ता कार्यक्रमले विद्यार्थीको पढाइका साथै अतिरिक्त कार्यमा समेत सरिक हुन प्रेरणा मिल्ने धारणा राख्नु भयो ।
यस्तै प्याब्सन झापाका अध्यक्ष छत्र बहादुर कार्कीले निजी विद्यालयले शिक्षाको क्षेत्रमा गरेको कार्यलाई सामान्य सोच्न नमिल्ने बताउनु भयो । विद्यालयमा हुने हरेक कार्यक्रमले विद्यार्थीको समग्र विकासमा सहयोग पुग्ने उहाँको विश्वास थियो ।
कार्यक्रममा बेस्ट टिचर अवार्डबाट कविता न्यौपानेलाई सम्मान गरिएको प्रिन्सिपल मोती बस्नेतले जानकारी दिनु भयो । कार्यक्रममा विद्यार्थीले विभिन्न सन्देश मुलक नृत्य तथा गायन प्रस्तुत गरेका थिए ।बार्षिकोत्सवको अवसरमा आयोजित विभिन्न खेलकुद प्रतियोगिताका विजयी विद्यार्थीहरूलाई ट्रफि तथा मेडलहरूसमेत प्रदान गरिएको थियो ।
२०६४ सालमा स्थापना भएको यस विद्यालयमा हाल कक्षा नर्सरी देखि ५ सम्म अध्यापन भइरहेको शिक्षिका मुना थापाले जानकारी दिनु भयो ।
विद्यालय व्यवस्थापन समितिका अध्यक्ष कृष्ण प्रसाद आचार्यको अध्यक्षता आयोजित कार्यक्रममा बुद्धशान्ती ६ का वडा अध्यक्ष शिवराज पौडेल, प्याब्सन झापाका अध्यक्ष छत्र बहादुर कार्की, बुद्धशान्ती गाँउपालिका कार्यपालिका सदस्य दिनेश लेप्चा लगायतको उपस्थिति रहेको थियो ।
कार्यक्रमको स्वागत विद्यार्थी सुपर्ना लामाले गर्नुभएको थियो भने सञ्चालन समिक्षा शेर्पा र अर्जुन अधिकारीले संयुक्त गर्नुभएको थियो ।
