झापा, २३ फागुन : विद्यार्थीलाई मादकपदार्थ बिक्री गरेको आरोपमा बिर्तामोड ३ स्थित ब्रदर होटलका सञ्चालक कुमार बस्नेतलाई प्रहरीले पक्राउ गरेको छ ।
महेन्द्र माध्यमिक विद्यालय बिर्ताबजारमा कक्षा ९ मा अध्ययनरत ३ जना छात्र र ३ जना छात्रालाई बस्नेतले बिहिबार बिहान १० बजे मादक पदार्थ (रक्सी) बिक्री गरेका थिए । विद्यालय पोसाकमै रहेका विद्यार्थीहरुले होटलमा गएर रक्सी किनेर सेवन गरेका हुन् । प्रहरीले विद्यार्थी मातेको अवस्थामा फेला पारेपछि अभिभावकको जिम्मा लगाएको थियो ।
होटल सञ्चालक ४६ वर्षीय बस्नेतलाई प्रहरीले अभिभावकको जाहेरीका आधारमा पक्राउ गरेर ५ दिन म्याद थप गरेको छ । उनलाई अभद्र व्यवहार शिर्षकमा जिल्ला प्रशासन कार्यालयबाट म्याद थप गरी अनुसन्धान भईरहेको इलाका प्रहरी कार्यालय बिर्तामोडका डीएसपी प्रकाश विष्टले जानकारी दिनुभयो ।
