सोलुखुम्बु, ८ चैत्र : अलैंची खेतीमा देखिएका समस्या समाधानकालागि नेपाल अलैँची व्यवसायी महासंघको टोलीले यतिबेला अलैंची उत्पादन हुने पूर्वी पहाडी जिल्लामा निरन्तर कार्यक्रम गरिरहेको छ ।
यही क्रममा महासंघले अलैँची उत्पादनदेखि बजारीकरणमा देखिएका समस्या समाधानको लागि सरोकार वालाहरूसँग छलफल तथा अन्तरक्रिया कार्यक्रम गरिरहेको हो । महासंघले आज शनिबार सोलुखुम्बुको लिकुपिकेमा कार्यक्रम सम्पन्न गरेको छ ।
कोशी प्रदेश उद्योग कृषि तथा सहकारी मन्त्रालयको सहयोगमा सञ्चालित अन्तरक्रिया तथा छलफल कार्यक्रम कोशी प्रदेशका ९ वटा जिल्लामा सञ्चालन गरिने महासंघका अध्यक्ष निर्मल भट्टराईले जानकारी दिनुभयो ।
नेपाल अलैँची व्यवसायी महासंघका अध्यक्ष निर्मल भट्टराईको अध्यक्षतामा भएको छलफल तथा अन्तरक्रिया कार्यक्रमको प्रमुख अतिथि गाउँपालिका अध्यक्ष मिना कार्की बस्नेतले अलैँची खेतीमा फैलिएको रोग र जंगली जनावर बाँदरले आतंक मचाउँदा किसानले ठूलो क्षति बेहोर्नु परेको बताउनु भयो ।
कार्यक्रममा सहभागी किसानहरूले अलैँचीमा देखिएको रोग ,सिँचाइ अभाव जलवायु परिवर्तनको प्रभाव,मूल्यको उतारचढाव र प्राविधिकको समस्या रहेको गुनासो गरेका छन् । अलैँची विकास केन्द्रका प्राविधिक दिलबहादुर श्रेष्ठले कृषकहरूले राखेको जिज्ञासाको उत्तर दिनुभएको थियो ।व्यवसायी लेखराज बस्नेतले स्वागत गरेको कार्यक्रमको सञ्चालन महासचिव नारायणप्रसाद चिमरियाले गर्नु भएको थियो ।
महासंघले धनकुटा, भोजपुर, संखुवासभा, खोटाङ र सोलुखुम्बुमा कार्यक्रम सम्पन्न गरेको छ ।
